在台灣生活交朋友容易嗎？朋友令你融入社會？
今個禮拜做到冇停手，點解？因為公司幫里奧叔叔安排線上與客人分享台灣生活事，而有好多人問里奧就係容唔容易識到香港人。
hum ..... 係台灣依家每一個城市既香港人都好多，而里奧相信每個城市都有好多港人whatsapp 群組，只要你去下當地港人開既餐廳食下飯，同老闆用廣東話打個招呼好快就會熟絡，再被邀請加入港人群組，偶然聚會一下，朋友就多到數唔曬，好可能過緊同香港差唔多既生活，相約飲下茶郊遊一下，行下山游下水，生活係台灣就好開心。
但係，認識同鄉係重要之外，點解冇人問里奧點樣可以認識台灣朋友既？🤣🤣
純粹個人覺得，既然已經移居台灣，我地係唔係好應該盡力去融入社會呢？我地係唔係應該努力地去學做一個台灣人呢？除咗日常生活去行街市、接受台灣銀行既工作效率🤣、閒時週圍睇下樓外，在地交朋友絕對係融入社會和了解本土文化既一個最好方法。
咁點樣可以認識到在地朋友呢？
講真，識朋友除咗講緣份之外，主動都好緊要，你既鄰居可以係你朋友，小朋友既家長可以係你朋友，打波運動都可以認識到朋友，問題係點樣可以發展大家既友誼。
朋友就係要多相處，台灣人大多數朋友比較熱情，待友之道人人唔同，就算里奧扮代表都分享唔到啲咩，不過有一樣野可以分享比大家聽，正所謂「出外靠朋友」，雖然我地交朋友唔會先抱有目的既心態，但事實上朋友都會係生活或工作上提供到好多實在意見，從大家相處時都會不經不覺學到好多，台灣朋友都會好樂意幫忙，當然自己都要識做人啦，唔好有事鍾無艷，加上主動熱情少不了，做台灣人首先學會主動熱情吧。😘😘
回想呢幾年認識到既朋友，里奧都真係唔記得係點識到，只係記得每一位朋友都係朋友介紹既朋友，又或者係被朋友邀請聚餐時而認識，唯一里奧記得既就係第一年用咗好多時間去參加聚會，不過里奧天生愛玩，聚會飲兩杯傾計吹水又吹唔完，聚多幾次就自然熟絡，依家里奧家逢週未都好多節目，幾乎全部都係呢幾年認識既台灣朋友居多。
里奧拿到身份證之後要買自住樓，身邊既朋友都比咗好多唔同既意見，緊張程度不比里奧嫂少，點解？因為朋友都怕里奧人生路不熟買貴樓，由買樓還價到里奧睇中心儀樓盤，大家都教識里奧好多好多，最後連收樓驗樓都主動嚟幫手，仲好記得里奧第一次等垃圾車倒垃圾「透天」，一班好朋友買埋外賣嚟里奧屋企聚餐，教里奧嫂點樣處理垃圾，嗰一刻真係好感動，呢幾年從家居生活到公司遇到唔同既問題，好多時候都係朋友互相幫忙，真係好正。
台灣朋友唔興收收埋埋，大家朋友乜都講一餐，呢個文化可能與香港有少少差別，佢地會好直接問你問題，剛開始里奧都有D唔習慣，無論工作、生意、生活，甚至有個住台北老友問過里奧叔叔一般會預留幾多cash 做家庭流動金等等，不過係真係好老友先會問得咁直接，但就真係唔知答唔答佢好🤣🤣，係生活細節既文化差異下，識朋友之餘都要學下點樣同朋友相處，不過好快就會慢慢融入，生活愉快。
祝大家在台灣可以開開心心咁生活
下面張相係里奧同台灣好朋友一齊去旅行影架，最後仲攞去參展，依家係台北某個捷運站展出，邊個係里奧？
厂厂 「哈哈」
#里奧叔叔
#投資移民
#創業移民
#日希移民
Search